مذاہب کی تشکیل کے اسباب کیا تھے؟

مذاہب کی تشکیل کی وجوہات اور اسباب کیا تھے؟ فقہی مذاہب کیوں اور کیسے وجود میں آئے؟

مسلم علاقوں کی توسیع اور اسلامی دنیا میں مختلف ثقافتوں کے شامل ہونے سے نئے نئے مسائل نے جنم لیا۔

رسول اللہ صلی اللہ علیہ وسلم کے وصال فرمانے کے بعد پیدا ہونے والے سیاسی مسائل اور علمی تنازعات نے بھی علمی میدانوں میں اختلاف رائے کو جنم دیا۔۔ اسی طرح اس وقت کے علماء کے مختلف پس منظر، تعلیم، ذرائع اور مختلف ذہنیت کی وجہ سے بہت سے مختلف نظریات اور تعلیمات سامنے آئی تھیں۔

ایک ہی آیت اور حدیث کی تشریحات علماء نے مختلف طریقوں سے کی ۔

فقہ کا ماخذ قرآنِ کریم اور  سنت رسولِ اکرم ﷺ تک پہنچتا ہے۔ اسی مآخذ کی مختلف تشریحات سے مذاہب  کی پیدائش ہوئی ہے۔ مثال کے طور پر اس آیت میں

جب تم نماز کے لیے اٹھو تو اپنے چہروں اور بازوؤں کو کہنیوں تک دھو لو اور اپنے سروں کا مسح کرو اور اپنے پاؤں ٹخنوں تک دھو لو …۔  (سورہ مائدہ، آیت 6)

تو جب اس جملے کی نحوی ترکیب کا تجزیہ کیا گیا تو لفظ “پاؤں” کی معنوی صورتوں میں اختلاف کی وجہ سے بعض علماء نے کہا کہ یہ آیت “پاؤں دھونے” کی تعلیم فرماتی ہے اور جب کہ دوسرے علماء نے اس سے مراد “پاؤں کا مسح کرنا” لیا۔

قرآن کی تفسیر کے بارے میں مختلف آراء کی وجوہات درج ذیل ہیں:

تشریح کرتے وقت لفظ کی کونسی تعریف کو مدنظر رکھا جائے؟ کون سی آیت پہلے نازل ہوئی؟ کیا یہ آیت منسوخ ہوئی؟ کیا یہ آیت کسی خاص چیز کی طرف اشارہ کر رہی ہے یا عام ؟ مندرجہ بالا مسائل علماء کے درمیان اختلاف کا باعث بنے۔

مثال کے طور پر قرآن میں سورہ بقرہ کی آیت 228 میں لفظ قُرُوءِِ کا ذکر آیا ہے۔ حنفی مکتب  کے علماء نے اس لفظ کو حیض کے معنٰی سے تعبیر کیا ہے جبکہ شافعی مکتب نے اس کا ترجمہ صفائی (طہور) کیا ہے۔ اسی طرح قرآن میں  سورہ مائدہ کی آیت 6 میں لفظ “لمس” کو شافعی مکتب کے علماء نے اس کے لغوی معنی کے ساتھ اور احناف نے اس کے علامتی معنی کے ساتھ تعبیر کیا ہے۔ اس وجہ سے، شوافع  یہ کہتے ہیں کہ عورت کی جلد کو چھونے سے وضو ٹوٹ جاتا ہے، جب کہ احناف کا استدلال ہے کہ اس سے مقصود عورت کے ساتھ جماع کرنا ہے۔

سنت کی تفسیر میں اختلاف کی وجوہات درج ذیل ہے :

رسول اللہ ﷺ  کے بعض احادیث کی روایت میں من و عن وہی الفاظ نہیں تھے جو رسول اللہ ﷺ کی زبانِ اقدس سے جاری ہوئے بلکہ ان کو مفہوماً بیان کیا گیا، جس کی وجہ سے رسول اللہ ﷺ کی روایتوں کے الفاظ میں فرق آتا ہے۔ تاہم راویوں نے اس بات پر غور نہیں کیا کہ انہوں نے جو الفاظ مفہوماً بیان فرمائے ان کی مختلف تشریحات کی جا سکتی ہیں،اور اس طرح ان الفاظ کی وجہ سے مختلف احکام ثابت ہوں گے۔

 اختلافات اور مختلف آراء کا ظہور مندرجہ ذیل عوامل کی وجہ سے ہوا:

ایک حدیث کے مختلف معانی ہونا، ایک ہی معاملے میں مختلف احادیث کا موجود ہونا، حدیث کے بارے میں مسلم فقہاء کا مختلف علم، متن کے مفہوم میں غلط فہمی کا شکار ہونا، حدیث کی سند کو ثابت کرنے کے طریقے  مختلف ہونا، ضعیف احادیث کے بارے میں ابہام اور عمومی عقیدہ وغیرہ۔

واضح رہے  کہ یہ اختلافات فقط فروعی مسائل کے بارے میں ہیں، جبکہ دین کے ضروری اصولوں میں کوئی اختلاف نہیں ہے۔ یہ اختلافات دین کے بنیادی جوہر کو تبدیل یا متاثر نہیں کرتے ہیں، ہاں اس سے عبادات کے طریقہ کار میں تنوع پیدا ہوا۔ مجتہدین کی رائے بعض فروعی معاملات میں مختلف ہو سکتی ہے لیکن سب اس بات پر متفق ہیں کہ دن میں پانچ وقت کی نماز، رمضان کے روزے اور زکوٰۃ وغیرہ واجب ہیں۔ وہ اسلام کی بنیادی باتوں میں اختلاف نہیں رکھتے ۔

مختلف تعلیمی پس منظر اور ماحول جس میں ان کی تربیت کی گئی تھی اور اس کے ساتھ ساتھ مختلف احکام کو اخذ کرنے کے لئے انہوں نے جو مختلف طریقوں کا استعمال کیا، اس کی وجہ سے مسلم فقہا مختلف نظریات کے حامل تھے اور اس سے مختلف مکاتب فکر کا ظہور بھی ہوا۔ روایتی طریقوں، ماحول اور ماحول کے عوامل نے فقہاء کے لیے مختلف آراء پیش کرنے کے لیے ایک مناسب میدان تیار کیا۔

بعض مجتہدین نے صحابہ کرام رضی اللہ عنہم کے نظریات کو اپنے احکام کے لیے قطعی منبع (دلیل) قرار دیا، جب کہ بعض نے اس کے برعکس استدلال کیا اور صرف چند صحابہ کے نظریات کو اپنے احکام کے لیے قابل قبول دلیل قرار دیا۔

مالکی مکتبہ اہلِ مدینہ کی روایات اور طریقوں کو اسلامی قانون کا ذریعہ مانتا ہے۔ اس کے بجائے دوسرے مکاتب صرف مدینہ کے لوگوں کے روایتی طریقوں کو ہی نہیں بلکہ مسلم سرزمین کے دوسرے خطوں کے روایتی طریقوں کو بھی ایک ذریعہ کے طور پر دیکھتے ہیں، لیکن صرف مخصوص حالات میں۔ مجتہدین کے مختلف نظریات کو متاثر کرنے والے کچھ اور عوامل ان کے مختلف کردار، شخصیتیں اور واقعات کے بارے میں نقطہ نظر بھی ہے۔

یہ بالکل فطری ہے کیونکہ ہر شخص کی سمجھ، ہنر، مہارت اور ذہنیت مختلف ہوتی ہے۔ مزید برآں، ایک شخص کا پس منظر، ماضی، تجربات، علم اور اصول دوسرے شخص سے مختلف ہوتے ہیں۔ لہٰذا یہ ناگزیر ہے کہ اس طرح کے اختلافات کے حامل افراد مختلف خیالات کا اظہار کریں گے۔

معاملات کے بارے میں ان کا نقطہ نظر اور وہ ذرائع جن سے وہ احکام اخذ کرتے وقت مدد لیتے ہیں وہ تمام عوامل ان کے خیالات کو متاثر کرتے ہیں۔

پہلے پہل مجتہدین نے فقہ کے ہر مضمون کے لیے اجتہاد کا اطلاق نہیں کیا تھا۔ پیدا ہونے والے مسائل کی وجہ سے اجتہاد کی ضرورت پیش آنے پر مجتہدین نے اس ضرورت کا جواب دینے کی کوشش کی۔ ان کے احکام کو مناسب عنوانات کے تحت کتابوں میں مرتب کیا گیا۔ جن اہل علم نے ان کتابوں کا مطالعہ کیا اور ان سے استفادہ کیا وہ کچھ خاص خیالات رکھنے لگے۔ اور اس طرح فقہی مذاہب کی تشکیل ہوئی۔

مجتہدین کے نظریات جو کتابوں میں مرتب کیے گئے ہیں وہ مکاتب میں نظام سازی کا باعث بنتے ہیں۔

ان مجتہد ائمہِ دین کے شاگرد اپنی تعلیم مکمل کرنے کے بعد  اپنے شہروں میں واپس آئے اور اپنے اس علم کو لوگوں تک پہنچایا، اس طرح ان  ائمہ کے نظریات خاص جغرافیائی خطوں میں پھیل گئے۔

واللہ ورسولہ اعلم